-ಸನತ್ ಕುಮಾರ್ ಬೆಳಗಲಿ

ದೇಶದ ಸ್ವಾತಂತ್ರ್ಯ ಚಳವಳಿಯಲ್ಲಿ ಪಾಲ್ಗೊಳ್ಳದೆ ಬ್ರಿಟಿಷ್ ಆಳರಸರ ಏಜೆಂಟಗಿರಿ ಪಾತ್ರವಹಿಸಿದ ಆರೆಸ್ಸೆಸ್‌ಗೆ ಒಂದಲ್ಲ ಹಲವಾರು ಮುಖಗಳು. ಬರೀ ಮುಖಗಳು ಸಾಲದೆಂದು ಮುಖವಾಡ ಗಳನ್ನು ಅದು ಇಟ್ಟುಕೊಂಡಿದೆ. ಅಟಲ್ ಬಿಹಾರಿ ವಾಜಪೇಯಿ ಇಂಥ ಮುಖವಾಡ ಎಂದು ಸಂಘ ಚಿಂತಕ ಗೋವಿಂದಾಚಾರ್ಯ ಹಿಂದೊಮ್ಮೆ ಹೇಳಿದ್ದರು. ಮುಖಗಳು ವಿರೂಪಗೊಂಡಾಗ, ಮುಖವಾಡಗಳು ಕಳಚಿಬಿದ್ದಾಗ, ಹೊಸ ಮುಖವಾಡಗಳನ್ನು ಹಾಕಿಕೊಳ್ಳುವುದು ಈ ರಾಷ್ಟ್ರೀಯ ಸ್ವಯಂ (ಭಕ್ಷಕ) ಸೇವಕ ಸಂಘದ ಚಾಳಿ. ಈ ರಾಷ್ಟ್ರದ ಜನತೆಗೆ ಈ ಸಂಘದ ಚಾಳಿ ಹೊಸದಲ್ಲ. ಆದರೂ ಅನೇಕ ಬಾರಿ ಅಮಾಯಕರು ಈ ಮೋಸದ ಮುಖವಾಡಕ್ಕೆ ಮಾರು ಹೋಗಿ ಖೆಡ್ಡಾಕ್ಕೆ ಬಿದ್ದಿದ್ದುಂಟು.

ಭಾರತ ಸ್ವಾತಂತ್ರಕ್ಕಾಗಿ ಹೋರಾಡುತ್ತಿದ್ದಾಗ ಸಂಘಪರಿವಾರಕ್ಕೆ ಹಿಂದೂ ರಾಷ್ಟ್ರ ಕಟ್ಟುವ ತೆವಲು ಅಂಟಿಕೊಂಡಿತು. ಸ್ವಾತಂತ್ರ ಹೋರಾಟದಲ್ಲಿ ಜಾತಿ-ಧರ್ಮ ಭೇದಕ್ಕೆ ಅವಕಾಶವಿರಲಿಲ್ಲ. ಹಿಂದೂ-ಮುಸ್ಲಿಂ-ಕ್ರೈಸ್ತ ಹೀಗೆ ಎಲ್ಲರೂ ಸೇರಿ ಹೋರಾಟಕ್ಕೆ ಇಳಿದಿದ್ದರು. ಈ ಏಕತೆ ಹಿಂದೂ ರಾಷ್ಟ್ರ ಕಟ್ಟಲು ಹೊರಟ ಆರೆಸ್ಸೆಸ್‌ಗೆ ಅಪಥ್ಯವಾಯಿತು. ಸ್ವಾತಂತ್ರ್ಯ ನಂತರ ಜಾತ್ಯತೀತ ಜನತಾಂತ್ರಿಕ ಭಾರತ ಅಸ್ತಿತ್ವಕ್ಕೆ ಬರುವುದು ಸಂಘಕ್ಕೆ ಬೇಕಾಗಿರಲಿಲ್ಲ. ಅಂತಲೇ ಸ್ವಾತಂತ್ರ ಹೋರಾಟಕ್ಕೆ ದ್ರೋಹ ಬಗೆದ ಅವರು ಹೋರಾಟಗಾರರನ್ನು ಬ್ರಿಟಿಷ್ ಪೊಲೀಸರಿಗೆ ಹಿಡಿದು ಕೊಡುತ್ತಿದ್ದರು.

 ಇಂತಹ ದೇಶದ್ರೋಹ ಪರಂಪರೆ ಹೊಂದಿರುವ ಆರೆಸ್ಸೆಸ್ ಸ್ವಾತಂತ್ರ್ಯ ನಂತರ ತನ್ನ ಕಾರ್ಯತಂತ್ರ ಬದಲಿಸುತ್ತ ಬಂತು. ಒಂದೆಡೆ ಜನಸಂಘದಂತಹ (ಈಗಿನ ಬಿಜೆಪಿ) ರಾಜಕೀಯ ಪಕ್ಷವನ್ನು ಕಟ್ಟಿ ಆ ಮೂಲಕ ರಾಜಕೀಯ ಅಧಿಕಾರ ಹಿಡಿದು ತನ್ನ ಹಿಡನ್ ಅಜೆಂಡ ಜಾರಿಗೆ ತರುವುದು ಸಂಘದ ಒಂದು ಕಾರ್ಯತಂತ್ರ. ಇನ್ನೊಂದೆಡೆ ಸಮಾಜವನ್ನು ಕೋಮು ಆಧಾರದಲ್ಲಿ ವಿಭಜಿಸಿ ಕಲಹದ ಕಿಡಿ ಹೊತ್ತಿಸಿ ಬಹುಸಂಖ್ಯಾತರನ್ನು ಒಂದೆಡೆ ಸೇರಿಸಿ ತನ್ನ ಫ್ಯಾಸಿಸ್ಟ್ ಅಜೆಂಡ ಜಾರಿಗೆ ತರಲು ಅದು ಯತ್ನಿಸುತ್ತದೆ. ಇವೆರಡು ಕಾರ್ಯತಂತ್ರ ಅನುಸರಿಸುವಾಗಲೂ ಸಂವಿಧಾನ್ಮಾತಕ ಆಡಳಿತ ಪದ್ಧತಿಯೊಂದಿಗೆ ಮುಖಾಮುಖಿಯಾಗುವ ಸಂದರ್ಭ ಎದುರಾಗುತ್ತದೆ.

ಶಾಸಕಾಂಗದಲ್ಲಿ ಮಾತ್ರವಲ್ಲ, ಪೊಲೀಸ್ ಇಲಾಖೆ, ಶಿಕ್ಷಣ ಕ್ಷೇತ್ರ, ರಕ್ಷಣಾ ವಲಯ, ನ್ಯಾಯಾಂಗ ಹೀಗೆ ಆಡಳಿತಾಂಗದ ಎಲ್ಲ ಆಯಕಟ್ಟಿನ ಜಾಗಗಳಲ್ಲಿ ಸಂಘದ ಕಾರ್ಯಕರ್ತರನ್ನು ನುಸುಳಿಸಿ ತನ್ನ ಫ್ಯಾಸಿಸ್ಟ್ ಕಾರ್ಯಸೂಚಿ ಜಾರಿಗೆ ತರುವುದು ಆರೆಸ್ಸೆಸ್ ಷಡ್ಯಂತ್ರವಾಗಿದೆ. ಸಾವರ್ಕರ್ ತುಂಬ ಹಿಂದೆಯೇ ಈ ರೀತಿ ಎಲ್ಲ ಕಡೆ ಸಂಘದ ಕಾರ್ಯಕರ್ತರು ನುಸುಳಬೇಕೆಂದು ಸಲಹೆ ನೀಡಿದ್ದರು. ಮಂಗಳೂರಿನ ಪಬ್ ಮತ್ತು ಹೋಮ್ ಸ್ಟೇ ಮೇಲಿನ ದಾಳಿ ಈ ಕಾರ್ಯತಂತ್ರದ ಭಾಗ. ಒಂದೆಡೆ ದಾಳಿ ಮಾಡುವ ಕಪಿಗಳ ಸೇನೆ, ಇನ್ನೊಂದೆಡೆ ಅವರನ್ನು ಸಮರ್ಥಿಸುವ ಮಹಿಳಾ ಆಯೋಗದ ಅಧ್ಯಕ್ಷೆ. ಇದೆಲ್ಲ ವ್ಯವಸ್ಥಿತ ಕಾರ್ಯತಂತ್ರ.

ತನ್ನ ಅಜೆಂಡ ಜಾರಿಗೆ ಅನೇಕ ಮುಖವಾಡಗಳನ್ನು ಆರೆಸ್ಸೆಸ್ ಬಳಸಿಕೊಳ್ಳುತ್ತದೆ. ದಿಲ್ಲಿಯ ರಾಮ್‌ಲೀಲಾ ಮೈದಾನದಲ್ಲಿ ನಿರಶನ ನಾಟಕ ನಡೆಸಿದ ಯೋಗಪಟು ಬಾಬಾ ರಾಮ್‌ದೇವ್ ಸಂಘಪರಿವಾರದ ಇಂಥ ಒಂದು ಮುಖವಾಡ. ಅಣ್ಣಾ ಹಝಾರೆ ಎಂಬ ಮುಖವಾಡ ಕಳಚಿ ಬಿದ್ದ ನಂತರ ಈ ಹೊಸ ಮುಖವಾಡವನ್ನು ಫ್ಯಾಸಿಸ್ಟ್ ಶಕ್ತಿಗಳು ಬಳಸಿಕೊಳ್ಳುತ್ತಿವೆ. ಈ ರಾಮ್‌ದೇವ್ ತನ್ನ ನಿರಶನ ಪೆಂಡಾಲಿನ ಹಿಂಬದಿಯಲ್ಲಿ ಭಗತ್‌ಸಿಂಗ್, ಚಂದ್ರಶೇಖರ್ ಆಝಾದ್ ಜೊತೆ ತನ್ನ ಚೋರ ಶಿಷ್ಯ ಬಾಲಕೃಷ್ಣನ್ ಫೋಟೋ ಹಾಕಿ ಈಗಾಗಲೇ ಸಾಕಷ್ಟು ಟೀಕೆಗೆ ಒಳಗಾಗಿದ್ದಾರೆ.

ಜನರ ಬಳಿಗೆ ನೇರವಾಗಿ ಹೋಗುವ ನೈತಿಕ ಶಕ್ತಿ ಆರೆಸ್ಸೆಸ್‌ಗಿಲ್ಲ. ಯಾಕೆಂದರೆ ಕರ್ನಾಟಕ ಸೇರಿದಂತೆ ಬಿಜೆಪಿ ಅಧಿಕಾರದಲ್ಲಿರುವ ರಾಜ್ಯಗಳಲ್ಲಿ ನಾನಾ ಹಗರಣಗಳು ನಡೆದಿವೆ. ಕೋಟ್ಯಂತರ ರೂಪಾಯಿ ಸಾರ್ವಜನಿಕ ಸಂಪತ್ತಿನ ಲೂಟಿಯಾಗಿದೆ. ಸಂಘದ ಕಾರ್ಯಕರ್ತರಾದ ಯಡಿಯೂರಪ್ಪ, ಅನಂತಕುಮಾರ್ ಸೇರಿದಂತೆ ಅನೇಕರು ಹಲವಾರು ಪ್ರಕರಣಗಳಲ್ಲಿ ಮೈತುಂಬ ಹೊಲಸು ಮೆತ್ತಿಕೊಂಡು ನಿಂತಿದ್ದಾರೆ. ಇಂಥ ಸನ್ನಿವೇಶದಲ್ಲಿ ಜನರ ಬಳಿಗೆ ಹೋಗಲು ಅಣ್ಣಾ ಹಝಾರೆ, ಬಾಬಾ ರಾಮ್‌ದೇವ್‌ರಂಥ ಮುಖವಾಡಗಳು ಆರೆಸ್ಸೆಸ್‌ಗೆ ಅನಿವಾರ್ಯ ವಾಗಿವೆ.

1974ರಲ್ಲಿ ಇಂದಿರಾಗಾಂಧಿ ತುರ್ತು ಪರಿಸ್ಥಿತಿ ಹೇರುವ ಮುನ್ನ ಜಯಪ್ರಕಾಶ್ ನಾರಾಯಣರನ್ನು (ಜೆಪಿ) ಮುಖವಾಡವಾಗಿ ಬಳಸಿಕೊಂಡ ಆರೆಸ್ಸೆಸ್ ತನ್ನ ನೆಲೆಯನ್ನು ವಿಸ್ತರಿಸಿಕೊಂಡಿತು. ಆರೆಸ್ಸೆಸ್ ಜೆಪಿಯವರನ್ನು ಎಷ್ಟು ದಾರಿ ತಪ್ಪಿಸಿತೆಂದರೆ, ಆರೆಸ್ಸೆಸ್ ಕೋಮುವಾದಿಯಾದರೆ ನಾನೂ ಕೋಮುವಾದಿ ಎಂದು ಬಹಿರಂಗವಾಗಿ ಹೇಳುವ ಮೂಲಕ ಜೆಪಿ ತಮ್ಮ ಅಭಿಮಾನಿಗಳಲ್ಲಿ ಭ್ರಮನಿರಸನ ಉಂಟು ಮಾಡಿದ್ದರು. ತುರ್ತು ಪರಿಸ್ಥಿತಿ ನಂತರ ಮೊರಾರ್ಜಿ ದೇಸಾಯಿ ನೇತೃತ್ವದಲ್ಲಿ ಜನತಾ ಸರಕಾರ ಅಸ್ತಿತ್ವಕ್ಕೆ ಬಂದಾಗ ಸರಕಾರದ ಒಳಗೆ ಸೇರಿದ ಆರೆಸ್ಸೆಸ್ ತನ್ನ ಅಜೆಂಡ ಜಾರಿಗೊಳಿಸಲು ಯತ್ನಿಸಿತು.

ಮೊರಾರ್ಜಿ ಸರಕಾರದಲ್ಲಿದ್ದ ಸಂಘ ಪರಿವಾರದ ಸಚಿವರು ಶಿಕ್ಷಣದ ಕೇಸರೀಕರಣಕ್ಕೆ ಮುಂದಾಗಿದ್ದರು. ಪಠ್ಯಪುಸ್ತಕಗಳನ್ನು ಕೋಮುವಾದೀಕರಣಗೊಳಿಸುವ ಪ್ರಯೋಗ ಆಗಲೇ (1977) ಆರಂಭವಾಯಿತು. ಆಗ ಸೋಷಲಿಸ್ಟ್ ನಾಯಕ ಮಧುಲಿಮಿಯೆ ಇದನ್ನ ಬಹಿರಂಗವಾಗಿ ವಿರೋಧಿಸಿದರು. ಜನಸಂಘವನ್ನು ವಿಸರ್ಜಿಸಿ ಜನತಾ ಪಕ್ಷದಲ್ಲಿ ಸೋಷಲಿಸ್ಟ್‌ರೊಂದಿಗೆ ಕೈಗೂಡಿಸಿದ ಆರೆಸ್ಸೆಸ್ ನಾಯಕರ ಮೊದಲ ನಿಷ್ಠೆ ಸಂಘಕ್ಕೆ ಇತ್ತು. ಇದರ ಪರಿಣಾಮವಾಗಿ ದೇಶದ ಪ್ರಥಮ ಕಾಂಗ್ರೆಸ್ಸೇತರ ಸರಕಾರದ ಪ್ರಯೋಗ ವಿಫಲಗೊಂಡಿತು.

ಎರಡನೆ ಬಾರಿ ಮಾಜಿ ಪ್ರಧಾನಿ ವಿ.ಪಿ.ಸಿಂಗ್ ಅವರನ್ನು ಮುಖವಾಡವಾಗಿ ಬಳಸಿಕೊಳ್ಳಲು ಆರೆಸ್ಸೆಸ್ ಯತ್ನಿಸಿತು. ಆದರೆ ವಿ.ಪಿ.ಸಿಂಗ್ ಸಂಘ ಪರಿವಾರದ ಅಪಾಯ ಮನಗಂಡು ಅದರಿಂದ ದೂರವಾಗುತ್ತಾ ಬಂದರು. ಅವರು ಪ್ರಧಾನಿಯಾಗಿದ್ದಾಗ ಹಿಂದುಳಿದವರಿಗೆ ಮೀಸಲಾತಿ ನೀಡುವ ಮಂಡಲ ಆಯೋಗದ ವರದಿಯನ್ನು ಜಾರಿಗೆ ತಂದರು. ಇದನ್ನ ವಿಫಲಗೊಳಿಸಲು ಮುಂದಾದ ಆರೆಸ್ಸೆಸ್ ಅಡ್ವಾಣಿ ಮೂಲಕ ಅಯೋಧ್ಯೆಯ ಬಾಬರಿ ಮಸೀದಿ- ರಾಮಮಂದಿರ ವಿವಾದ ಸೃಷ್ಟಿಸಿದರು. ಇದರ ಪರಿಣಾಮವಾಗಿ ತನ್ನ ನೆಲೆಯನ್ನು ವಿಸ್ತರಿಸಿಕೊಂಡಿತು.

ಹೀಗೆ ಕಾಂಗ್ರೆಸ್ಸೇತರ ಪಕ್ಷಗಳನ್ನು ಒಂದುಗೂಡಿಸುವ ರಾಜಕಾರಣ ಪ್ರತಿ ಬಾರಿಯೂ ಸಂಘಪರಿವಾರಕ್ಕೆ ಅನುಕೂಲವಾಗುತ್ತ ಬಂದಿದೆ. ಇಂಥ ಸಂಯುಕ್ತರಂಗದ ರಾಜಕಾರಣ ಮಾಡಿ ಸಮಾಜವಾದಿ ಪಕ್ಷ ಸೇರಿದಂತೆ ಇತರ ಪಕ್ಷಗಳು ತಮ್ಮ ಅಸ್ತಿತ್ವವನ್ನೇ ಕಳೆದುಕೊಂಡವು. ಆದರೆ ಆರೆಸ್ಸೆಸ್ ತನ್ನ ಅಸ್ತಿತ್‌ವನ್ನು ಹೆಚ್ಚಿಸಿಕೊಳ್ಳುತ್ತ ಬಂತು. ಕೇಂದ್ರದಲ್ಲಿ ಅಧಿಕಾರ ಸೂತ್ರ ಹಿಡಿಯುವಷ್ಟು ಪ್ರಬಲವಾಗಿ ಬೆಳೆಯಿತು. ಬೆಳೆದ ನಂತರ ತನ್ನ ವಿಭಜನಕಾರಿ ಅಜೆಂಡಾ ಜಾರಿಗೆ ತರಲು ಷಡ್ಯಂತ್ರ ರೂಪಿಸುತ್ತ ಬಂತು.

ಈಗ ರಾಮ್‌ದೇವ್ ನೇತೃತ್ವದಲ್ಲಿ ಭ್ರಷ್ಟಾಚಾರದ ವಿರುದ್ಧ ನಡೆದ ನಿರಶನ ಪ್ರಹಸನವು ಸಂಘಪರಿವಾರದ ವಿಭಜನಕಾರಿ ಕಾರ್ಯತಂತ್ರದ ಭಾಗವಾಗಿದೆ. ಯುಪಿಎ ನೇತೃತ್ವದಲ್ಲಿ ಕೇಂದ್ರ ಸರಕಾರದ ಜನವಿರೋಧಿ ಧೋರಣೆಗಳಿಂದ ರೋಸಿ ಹೋಗಿರುವ ದೇಶದ ಜನಸಾಮಾನ್ಯರನ್ನು ಸೆಳೆಯಲು ರಾಮ್‌ದೇವ್‌ರಂಥ ಮುಖವಾಡಗಳು ಬಳಕೆಯಾಗುತ್ತಿವೆ. ಯುಪಿಎ ವಿರುದ್ಧದ ಜನಾದೇಶದ ಬೆಂಬಲವನ್ನು ಬಿಜೆಪಿಯತ್ತ ಕ್ರೋಡೀಕರಿಸುವ ಕಾರ್ಯತಂತ್ರ ರೂಪುಗೊಂಡಿದೆ.

ಅಂತಲೇ ಈ ಮುಖ ಮತ್ತು ಮುಖವಾಡಗಳನ್ನು ಕಿತ್ತು ಬಿಸಾಡಲು ಜಾತ್ಯತೀತ ಪ್ರಗತಿಪರ ಶಕ್ತಿಗಳು ಒಂದೇ ವೇದಿಕೆಗೆ ಬರಬೇಕಿದೆ. ನರೇಂದ್ರ ಮೋದಿಯಂಥ ನರಹಂತಕರನ್ನು ಈ ದೇಶದ ಪ್ರಧಾನಿಯನ್ನಾಗಿ ಮಾಡುವ ಷಡ್ಯಂತ್ರವನ್ನು ಆರೆಸ್ಸೆಸ್ ರೂಪಿಸಿದೆ. ಇದಕ್ಕೆ ದೇಶ-ವಿದೇಶಗಳ ಕಾರ್ಪೊರೇಟ್ ಕಂಪೆನಿಗಳ ಬೆಂಬಲವೂ ಇದೆ. ಬರಲಿರುವ ಈ ಗಂಡಾಂತರದಿಂದ ಭಾರತವನ್ನ ರಕ್ಷಿಸಬೇಕಿದೆ.

ಈ ವಾರ್ತೆಯನ್ನು ಮುದ್ರಿಸಿ

ವರದಿಯ ವಿವರಗಳು

ವರದಿಗಾರರು : ಕರ್ನಾಟಕ ವರದಿಗಾರರು ಪ್ರಕಟಿಸಿದ ದಿನಾಂಕ : 2012-08-13